Kronikë

Rrëfehet gazetari që raportoi shpërthimin e eksplozivit: Ja tmerri që pashë me sy

               Publikuar në : 19:37 - 12/03/18 Bardhi

Paraditen e sotme kryeqyteti u trondit nga një shpërthim i fuqishëm, i cili ndodhi vetëm 100 metra larg Liceut Artistik, shumë pranë Institutit të Higjienës.

Ishte ora 10:30 e mëngjesit,  kur nga një servis celularësh u dëgjua një zhurmë e fuqishme aq sa vala e shpërthimit shpërndau xhamat e servisit përreth zonës.  

Nga ky shpërthim mbeti i plagosur rëndë 34-vjeçari Gentian Hoxha për të cilin dyshohet se montonte mina me telekomandë.

Tirana Today mundi të xhironte në kohë rekord ngjarjen, pasi gjithçka ndodhi para syve të gazetarit Laert Miraku, i cili ia hodhi paq shpërthimit.   

Gazetari rrëfen për redaksinë gjithë dinamikën e ngjarjes.

Rrëfimi i gazetarit të Tirana Today: 

Isha duke lëvizur me biçikletë dhe po kaloja në një rrugë që e bëj çdo ditë. Gjithçka ishte e qetë, por papritur dëgjohet një shpërthim i fuqishëm dhe para syve të mi fluturojnë xhamat në ajër duke arritur në krahun tjetër të rrugës.

Fillimisht pashë të dilte tym nga dyqani i celularëve. Të gjithë kalimtarët dhe njerëzit që punonin dhe jetonin u hutuan dhe për një moment u larguan.Pastaj filluan të flisnin me njeri tjetrin nëse kishte njeri brenda në dyqan apo jo. Dy nga persona që kishin bizneset ngjitur me të pohuan se panë djalin të futej por që nuk kishte dalë.

Për rreth tre minuta askush nuk guxonte të futej në dyqan. Nga jashtë nuk duhej asgjë vetëm tym i zi. Një burrë rreth të 50-ve u fut i pari brenda dhe u tha të tjerëve që është njeri i shtrirë dhe i gjakosur por është akoma gjallë.

Në atë moment janë futur tre persona brenda dhe kanë nxjerrë prej aty trupin e Gentian Hoxhës. Ai ishte i mbuluar nga gjaku dhe bloza.

Në momentet që po dilte dukej se ishte një trup i djegur po nga lëvizjet e kokës duket se kishte shenja jete.

Ajo që u vu re menjëherë ishte gjaku në fytyre dhe se i ishin këputur gishtat. Fytyra e tij ishte e nxirë totalisht nga tymi dhe gjaku.

Në njërën këmbe i ishin grisur xhinset. Gentiani nuk nxirrte zë, afronte duart rreth gjoksit, ku dukeshin qartë se ishin këputur gishtat.Personat që e nxorën nga dyqani e shtrinë në trotuar dhe u munduan të largonin sa më shumë njerëzit. Shumica e të pranishmëve u tronditen shumë dhe u larguan të tjerët rrinin dhe shihnin.

Rreth 5 minuta pas shpërthimit erdhi në vendngjarje makina e parë e policisë e cila fillimisht u kërkoi njerëzve të rrinin sa më larg vendit të ngjarjes. Ndërsa 10 minuta më pas zbarkoi në vendngjarje edhe ambulanca e cila mori dhe të plagosurin.

Në atë moment njeriu e ka të vështirë të jetë i kthjellet të bëjë detyrën e gazetarit që të raportojë ngjarjen kur i shpëtoi paq një vdekje të sigurt nga xhamat që fluturuan në ajër dhe u përplasën në lokalin që ndodhej në krahun tjetër të rrugës.

Në momentet e para kur të gjithë po largoheshin bëra fotot e para nga larg. Më pas u afrova më shumë.

U ndjeva pak keq për shkak të rrethanave, se isha i detyruar të filmoja me celular. Njerëzit menduan se isha thjesht kureshtar dhe videon po e realizoja për qëllime personale.

Në ato momente bëra detyrën time si gazetar.  Mora në telefon kryeredaktorin e Tirana Today dhe raportova mbi ngjarjen.

Bëra  foto dhe një video të vogël.

Tregova që shpërthimi ishte i fuqishëm dhe duhet të ishte patjetër lëndë eksploziv. Pas shpërthimit ndjeva aromën e tritolit të djegur.

Kam jetuar pranë një zonë ushtarake dhe kam njohuri mbi barutin, tritolin dhe nitroglicerinën.

Menjëherë raportova se ishte shpërthim me eksploziv dhe nuk e pranova deklaratën e parë të policisë së ishte shpërthim i një bombole gazi.

Pas 2 orësh u riktheva sërish në vendin e ngjarjes dhe pashë që e gjithë rruga “Qemal Guranjaku” ishte e bllokuar nga policia dhe nuk lejohej qarkullimi i makinave dhe njerëzve. Pasi bëra raportimin falënderova Zotin që shpëtova paq nga ai shpërthim.

TIRANA TODAY

 

 

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *

Kthehu