Politikë

Cili ka qenë roli i Berishës në vrasjen e Azemit? Kush e donte të vdekur?

               Publikuar në : 10:58 - 14/09/18 marsela

Ish-shefi i Shërbimit Informativ njëzet vite më parë, Prof. Fatos Klosi flet për ngjarjet që tronditën vendin në shtator 1998, vrasjen e deputetit demokrat Azem Hajdari dhe grushtin e shtetit. Nuk ka asnjë mëdyshje kur në këtë intervistë ekskluzive për DITA-n thotë se ai ishte një grusht shteti i mirëfilltë, pasi i kishte të gjithë elementët për t’u quajtur i tillë.

Pse është plotësisht legjitime kërkesa e Izet Haxhisë për rihapjen e procesit “Hajdari” nga fillimi. Cilët kanë qenë të interesuar për vrasjen e Azem Hajdarit dhe kush e pengon edhe pas njëzet vjetësh zbardhjen e së vërtetës…

Zoti Klosi, jemi 20 vjet pas vrasjes së Azem Hajdarit, dhe tentativës për Grusht Shtetit. Ju jeni një prej njerëzve për shkak të funksionit që keni pasur, keni disponuar edhe një informacion tjetër të detajuar. Sot është kjo çështje po diskutohet akoma. Kush e nxori Azemin në pritë?

– Kjo është një pyetje  aq e vjetër sa  dhe ngjarja. Ngjarja është trajtuar me hollësi në një proces gjyqësor me të dyja shkallët . Unë nuk mund të shtoj asgjë mbi ]’ka është thënë në atë proces.

A ishte vërtetë tentativë për grusht shteti ai i 14 shtatorit?

– Sipas meje po, në planet e kryengritësve ishte rrëzimi i pushtetit me anë të dhunës. Në këtë kuadër ata morën me dhunë pothuaj të gjithë institucionet kryesore të shtetit. Dolën dhe në TV publik dhe e deklaruan këtë gjë. Faktorë të jashtëm i bindën që ta ndërprisnin këtë maskaradë dhe kështu ikën me bisht ndër shalë dhe u barrikuan në selinë e PD.

Izet Haxhia ka ardhur në Shqipëri dhe kërkon rihapjen e dosjes. A është e mundur që të rigjykohet kjo çështje?

– Izet Haxhia ka ardhur dhe me të drejtë kërkon hapjen e dosjes për rishikimin e pozicionit të tij në këtë ngjarje, pasi është dënuar në mungesë. Në këtë kuadër rihapja e çështjes është e ligjshme. Por po kalon shumë kohë dhe kurrkush nuk po merret me këtë kërkesë të Izet Haxhisë. Me sa duket politika, që gjithmonë ka komanduar në këtë vend, nuk është e interesuar për këtë gjë.

Cilat janë pikat e errëta që ende nuk janë zbardhur?

Për mua më e errët ka mbetur situata pas ngjarjes, se si u eliminuan pothuaj të tërë ata që  mund të hidhnin dritë mbi ngjarjen dhe kurrkush nuk mbajti përgjegjësi për këto ngjarje.

– Cili ka qenë roli i Sali Berishës në vrasjen e Azemit?

– Ka qenë roli i një të interesuari për vrasjen dhe për shfrytëzimin e mëpastajmë politik të saj.

Mero Baze në një shkrim dje aludonte se ka qenë Sali Berisha dhe Genc Pollo dy personat që e nxorën Azemin nga zyra. Keni këtë dijeni ju?

– Jo nuk kam patur asnjë mundësi tjetër, veç burimeve mediatike, për ta ditur këtë gjë.

Besoni se reformimi i sistemit të drejtësisë do të zbardhë të vërtetën e ngjarjeve tragjike të 20 viteve më parë?

– Unë shpresoj që reformimi i Sistemit të Drejtësisë do të krijojë premisat që të gjitha ngjarjet e mëdha të periudhës së tranzicionit të rishihen, larg interesave të klasës politike, që gjithmonë ka qenë e implikuar në to dhe ka penguar zbardhjen e drejtë të tyre. /gazetadita

 

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *

Kthehu